الأحد، 14 أغسطس 2011

راني توحشتك يازيزو

واحد يمشط في شعرو بالجال
والاخر وجهه بالكريم يكسّل فيه
واحد هدّ فيه شعبه هرب
والاخر بالشمعة يفركتوا عليه
داب في واد ينهق ومتخفي
ومحروق في عيادة يضمدوا فيه
زرافة في غابة تجري وتزعبط
وكلب مغلوث صبّوا الماء عليه

راني توحشتك يازيزو

ماء زمزم وصلوه إلى هوليود
ومواطن الحجّ منعوه عليه
كل خطوة يمشيها يُعتقل
وكل ركعة يسجد فيها
الكاميرا تلتقط فيه

راني توحشتك يازيزو

واحد في رِزْقه مضايق ومحاصر
وخائن نصّاب يمولو فيه
واحد في أوربا النساء من ورائه تتبع
وبغل في شعبة قصديرة تسوق فيه

راني توحشتك يازيزو

أحكيلي على الحرقة يازيزو
كيفاش خليت ذوك القصور؟
وخرجت بلا وثائق بلا هوية
في ليلة ظلماء بعدما ناموا الطيور ؟
كيفاش بت ليلتك في جدة
بعدما كاد يحبس بك الموتور؟
مالقيت لاصاحب لارفيق
والناس كلّها بقرطاج على قصرك تدور

راني توحشتك يازيزو

سلملي يازيزو على العجوز
وقل لها راه جايك التور
كي أنت كي القياد والباشاغات
مساكنكم في النهاية هي القبور
الشعوب من ظلمكم راها انتفضت
رايحة تنزع الستار وتكشف المستور
ماينفع غير الصح ويطلع النهار
وتزول في النهاية سكرة المخمور

راني توحشتك يازيزو

نورالدين خبابه
10/08/2011

0 التعليقات:

إرسال تعليق

((من كان يؤمن بالله واليوم الآخر فليقل خيراً أو ليصمت))