الأحد، 21 سبتمبر 2014

سحابة تمرّ على الجزائر


يا خويا أنا أخوك ، اذا حبيت أرواح تفهم

نحكي لك على الجزائر، اسمعني، واقرأ تسلم !
الرداءة لسان الحال، والجاهل ، باحث يعلّم !
الفساد عيني عينك ، والمُصلح، قالولو أحشم !
النصّاب صار خبير، والأمين ،ردّوه مُجرم !

يا خويا أنا أخوك ، اذا حبيت أرواح تفهم

الشرطي خويا وخوك ،والجندي، زوّالي محتّم !
في الصفّ ديما يقدموه ، للمعركة، باش يزدم !
الصحفي ايّاك  شروه ، بالكتابة، راه  يهمهم !
يضلل في الناس بالكذب، تحتار مرّات، اذا هو مسلم !

يا خويا أنا أخوك ، اذا حبيت أرواح تفهم

البطالة للفقراء ، وأولادهم أسياد، ما قرأ ما فهم !
باعوا دم الشهداء ، والله ، والواقع هو الي تكلّم !
جيت نفهّم فهموني  ، في السياسة، قا لولي تعلّم !
جنرال  باع البلاد  ، على المشاريع، راهو  يخمّم !
 غريبة  في التربية ،  على أولادنا راها تخدم !
ناس يسواو حطموهم ، تقول نهزّ قرداش ونلطم !

يا خويا أنا أخوك ، اذا حبيت أرواح تفهم

شاهد ما شافش حاجة، بالمال، يمضي ويبصم !
كل يوم يأخذ سكن،  و يحلف بالله ماخذاش، ويُقسم !
يا حفيظ من هذا القوم ، الي يحقروا في المعلّم !
البلاد مدّيها  الواد ، وهو في الواد يتحمّم !

يا خويا أنا أخوك ، اذا حبيت أرواح تفهم.

بن بولعيد في الأوراس قتلوه ،وبوضياف ،في عنابة أعدم !
ولد الشهيد همشوه ، وولد القومي، هو الي يصمّم !
تاريخ البلاد شوهوه، ومستقبل أجيال ،حبّوه يتحطّم !
ديغول قالها في الثورة ، بعد ثلاثين عام، يرجع يحكم !.

يا خويا أنا أخوك ، اذا حبيت أرواح تفهم.

0 التعليقات:

إرسال تعليق

((من كان يؤمن بالله واليوم الآخر فليقل خيراً أو ليصمت))